Ka Ariel Magbanua, Spokesperson
NPA-South Central Bukidnon
4 May 2017
Press Release
Misurender ang pito ka ka membro sa ALAMARA-CAFGU nga ilalom sa Special Force (SF) kaniadtong Abril 28, 2017, bandang alas 7:30 sa buntag, ngadto sa New People’s Army – Section 5 South Central Bukidnon – Sub-Regional Command, North Central Mindanao Region (SCB-SRC, NCMR).
Kini nga mga ALAMARA –CAFGU naka base sa Sagundanon, Kibawe, Bukidnon. Gilangkuban kini sa lima ka lalaki ug duha ka babae nga silang Antonio Mansaloon (Team Leader) ug igsoong si Tiano Mansaloon. Robert Pawas, Angel Mandalomon, Angela Pawas ug Elie Mandalomon nga tanan taga Sunipon, Natulungan; ug si Jr Limpangan sa Brgy. Sagundanon, nga tanan sakop sa lungsod sa Kibawe, Bukidnon.
Ang ilang boluntaryong pagsurrender gibunga sa atong pagpasabot ug panawagan nga talikdan na ang ilang grupong ALAMARA nga gitukod sa Armed Forces of the Philippines (AFP), tungod kay kini ang gihimong hinagiban aron bungkagon ang panaghiusa sa katawhang lumad ug ilugon ang ilang yutang kabilin aron himoong plantasyon ug minahan.
Miaging tuig pa lang, gusto nang mosurrender si Antonio Mansaloon tungod sa wala matuman sa AFP ang gisaad kanila nga hatagan sila og sweldo ug saktong pagkaon. Pugos usab sila nga gipagiya sa mga operasyong militar sa kabukiran.
Dala nila ang usa ka improvised M79, apil ang 23 ka mga buhing bala nga grenade launcher; usa ka improvised M16; usa ka garand riffle (serial # 978823); duha ka M14; duha ka Shotgun nga D12; mga buhing bala; magazine; vest; usa ka radio; ug duha ka riffle grenade.
Sa laing bahin, malampusong nadis-arma sa yunit sa Section 3 – SCB – NCMR ang duha ka carbine, usa ka D12 ug mga bala gikan sa managsuong Edgar ug Erick Ordinisa, kaniadtong Abril 29, alas 7:30 sa gabii. Nagpuyo kini sila sa Purok 2 Nakabuklad, San Fernando, Bukidnon, ug nahimo kini silang saligando ni Valentine Ordinisa aron sa pagbantay sa iyang yuta. Apan ginagamit nila ang ilang armas sa pagpangharass sa ilang mga silingan pinaagi sa pagpabuto-buto bisan kung igo lang muagi sa ilang umahan.
Lain pang aksyong harassment ang gilunsad sa usa ka team sa NPA Section 3-SCB-NCMR niadtong Abril 23 sa alas 8:00 sa buntag, sa nag operasyong 60TH Infantry Battalion. Kauban ani nga mga sundalo ang 22 ka membro sa ALAMARA-CAFGU nga gikan sa boundary sa Davao padulong sa Brgy. Bonacao. Gipabuthan sila sa NPA samtang kamulo og pasubida sa bongtud, kung asa 500 meters pa ang kalayo niini gikan sa komunidad sa Salumpikit, Brgy. Bonacao. Busa, sa ilang kasuko sa pag pangharass sa NPA, gi-straping nila ang komunidad, hinungdan sa dako nga kalisang sa mga lumolopyo nga miresulta sa ilang pinugos nga pagbakwit. Gibunga lamang kini nga aksyon sa walay puas nga militarisasyon sa komunidad ug pagpanglapas sa tawhanong katungod sa mga sibilyan sa AFP ug Paramilitary.
Sulod lamang sa usa ka semana, nakaangkon na usab og kadaugan ang rebolusyonaryong kalihukan pianaagi niining tulo ka malampuson nga mga aksyong militar sa NPA. Tungod kini sa padayon nga paglapas sa AFP, uban sa gi-armasan nila nga mga paramilitary, sa balaod sa gubat, taliwala sa paningkamot sa National Democratic Front (NDFP) ug Government of the Republic of the Philippines (GRP) nga mapadayon ang Peace Talks. Busa, gipatuman lamang sa SCB ang mando sa National Operational Command (NOC) nga maghimo og aktibong depensa sa Area of Responsibility (AOR).
Busa, ginaawhag nato ang tibuok katawhang nilupigan ug pinahimuslan nga padayong suportaran ang rebolusyonaryong kalihukan aron hingpit nga masilotan ang kinsa mang nagalapas sa tawhanong katungod sa katawhan ug maangkon ang nato ang tinuod ang kagawasan ug kalamboan. Gipanawagan usab namo ang tanang sektor sa katilingban nga mosuporta sa pagpadayon sa hisgutanang pangkalinaw sa NDFP ug GRP, aron makab-ot nato ang malungtarong kalinaw nga nakabase sa hustisya ug kaangayan.
https://www.philippinerevolution.info/statements/20170504-malampusong-mga-aksyong-militar-sa-npa-scb-ncmr-napahigayon
No comments:
Post a Comment
Note: Only a member of this blog may post a comment.