Saturday, February 25, 2017

CPP/NPA: Andam an NPA nga arestuhon hi Meyor Jojo Grey komo utok han serye han panmatay ngan paglurab han iligal nga druga ha San Jorge

New People's Army propaganda statement posted to the Communist Party of the Philippines Website (Feb 23): Andam an NPA nga arestuhon hi Meyor Jojo Grey komo utok han serye han panmatay ngan paglurab han iligal nga druga ha San Jorge (NPA prepares to arrest Mayor Jojo Grey as the brain behind a series of killings and distribution of illegal drugs in San Jorge)

Communist Party of the Philippines  
Arnulfo Ortiz Command
New People’s Army
Western Samar

Pahayag ha Mantalaan
23 February 2017

Andam an NPA nga arestuhon hi Meyor Jojo Grey komo utok han serye han panmatay ngan paglurab han iligal nga druga ha San Jorge Ginkukundenar yana han Arnulfo Ortiz Command-New People’s Army-Western Samar an pinakabag-o nga kaso han panmatay ha San Jorge, Western Samar kun diin ginpusil-patay hi Minda Bisnar hadin Pebrero 19. Sigon ha AOC-NPA-Western Samar, an mga ebidensya nga iginpadangat ha rebolusyunaryo nga husgado han katawhan nagtutudlok kan Jojo Grey, presente nga meyor han bungto komo utok han susrunod nga krimen dinhi.

“Hi Jojo Grey usa nga despotiko nga warlord nga nagmementinar hin private army tikang pa han 2004 nga amo an gin-gagamit hini ha mga kontra-katawhan nga aktibidad. Armado ini nga iya mga goons hin higtaas nga kalibre hin pusil ngan ginkakahadlukan han mga parag-uma ngan molupyo ha bungto. Labot pa hini, hi Grey an pinakadako nga druglord ha San Jorge ngan naakto nga supplier han druga ha mga kasapit nga bungto ngan isla,” sigon pa ha pahayag han AOC-NPA-Western Samar.

“Inabot na ha pungkay an pagin lanong nga kriminal ngan kontra-katawhan ni Grey. Pira na ini kabeses nga ginpahimatngunan han rebolusyunaryo nga kagiusan ngan gin-aghat nga umatubang ha husgado han katawhan agud batunon an mga iginsalawad nga kaso kontra ha iya kundi waray hiya pamati lugod nagdamo pa an ihap han iya mga ginpatay. Baga-baga hin iginpapalaypakay gud ni Grey an iya poder ngan an kapas han iya private army tungod kay waray man ginhihimo an reaksyunaryo nga kapulisan ngan militar nga nagpapakabuta-bungol ha mga aktibidad hini.

Kun diri nagseserbe komo utok han mga kriminal nga aktibidad, hi Grey mismo an naakto nga triggerman ha mga panmatay labina gud kun mga kakontra ha pulitika an target. Yana la nga bulan han Pebrero napakyas an iya pag-atentar nga patayon hi Lester Bisnar, makusog niya nga kritiko ngan kabangga ha naglabay nga eleksyon komo meyor han bungto. Tungod kay waray magmalinampuson an pag-ambus kan Lester, ginbirikan ni Grey an iroy hini nga tikang pa gudla ha singbahan han pagpupsilon.

Naghimo liwat an mga Grey hin drama nga pag-ambus kuntaloy ha iya asawa nga hi Nancy Bernales Grey ngan ginpagawas nga mga NPA kuno an naghimo. Waray ini kamatuoran ngan subay ha pag-imbestiga han NPA, ginlugaringan han mga Grey an “pag-ambus” agud pagawson nga may hulga ha ira seguridad.

Labot han pinakalab-as nga pan-ambus ngan panmatay ha mga Bisnar, hilaba an listahan han mga ginpatay ngan gin-atentaran ipapatay ni Grey nga amo an masunod:

1. Pagpatay han magtalaamay nga Inofre ngan Inorio dela Cruz samtang nasamaran naman hi Mario dela Cruz ha Brgy. Puhagan, San Jorge, Samar hadton tuig 2003.
2. Pagpatay kan Janjan dela Cruz ngan Omar Original nga chief tanod ha Brgy. Puhagan, San Jorge, hadton 2003.
3. Brutal nga pagpatay han burod nga hi Imac dela Cruz nga asawa ni Balodoy dela Cruz hadton 2007 ha Brgy. Puhagan, San Jorge, Samar.
4. Utok han pagpatay han kapitan ha Brgy. Mabuhay, San Jorge, hadton Pebrero 2016.
5. Utok ha pakyas nga pagpatay ha kapitan han Brgy. Rawis, San Jorge hadton Marso 2016.
6. Pag-ambus kan Lester Bisnar, iya kakontra komo meyor ha adlaw mismo han eleksyon hadton 2016. Hiya mismo an nakada ha panhitabo kabakyang an iya anak, bugto ngan an iya bayaw ha pag-ambus.
7. Pagin druglord ngan pagpalurab han iligal nga druga ha San Jorge ngan kasapit nga mga bungto nga nagigin hinungdan han paghitaas han ihap han mga kaso han kriminalidad.
8. Pagmentinar han private army nga gin-gagamit ha panarhug, panringgal ngan panmatay ha hin-o man nga molupyo nga nakontra ha iya pagpadalagan han bungto ngan mga iligal ngan kriminal nga aktibidad.

Tungod hini nga mga kaso ngan magkusog nga ebidensya nga iginplastar han katawhan han San Jorge kontra ha iya, gintatawag naton an atensyon ni Meyor Jojo Grey nga agap nga makigbuligay ngan batunon an iya mga kaso. Ginmanduan na han husgado han katawhan an Arnulfo Ortiz Command-New People’s Army ha Western Samar nga arestuhon hi Grey ngan paatubangon ha husgado han katawhan.”

Nanawagan naman ha publiko an AOC-NPA-Western Samar nga magpursige nga ipakigbisog an ira mga demokratiko nga katungod atubangan han nagtitikagrabe nga panalapas han tawhananon nga katungod.

“An padayon nga paghadi han mga warlord ngan druglord sugad kan Grey nagpapamatuod nga ilrum han rehimen Duterte, nagpapadayon an natikapintas nga pasismo ngan klima han impunidad o pagpatakas ngan kawaray baratunon. Damo na nga mga “pusher” ngan “nagamit hin druga” an ginpatay pinaagi han Oplan Tokhang ngan Gerra Kontra-Druga ni Presiente Rodrigo Duterte, kundi waray bisan usa nga druglord ha Samar an nakasuhan ngan nasirutan. Ha katapus-tapusan, makakab-ot la an tinuod nga hustisya ngan kamurayawan pinaagi han pagpursige han katawhan ha dalan han armado nga rebolusyon.”

https://www.philippinerevolution.info/statements/20170223-andam-an-npa-nga-arestuhon-hi-meyor-jojo-grey-komo-utok-han-serye-han-panmatay-ngan-paglura

No comments:

Post a Comment

Note: Only a member of this blog may post a comment.